SUMBANAN SA PAGPADAPAT OG PROYEKTO SA GOBYERNO

Dunay mga theories sa Psychology ug sa Public Administration nga puwede mamahimong sumbanan sa pagpadapat og proyekto sa gobyerno. Naay usa ka theory (Maslow's Heirarchy of Needs Doctrine) nga nag ingon nga ang pinaka kinahanglan sa tawo maoy dapat unahon niya pag-atubang o himoon ug dili tong dili kaayo importante sa iyang kinabuhi ang iyang sulayan og himo/tilaw/atubang.

Ang Maslow's Hierarchy of Needs Theory/Doctrine nag-ingon nga dapat unahon sa usa ka tawo ang SELF-ACTUALIZATION, unsa man ni siya? Kining self-actualization mao kini ang pinakataas nga kinahanglanon sa usa ka tawo, sama sa panapot (sinina,karsones etc.) pagkaon, balay, edukasyon. Ang ubang mga kinahanglanon sama sa sakyanan, lingaw-lingaw, suroy-suroy ug uban pang mga luho ug mga gagmay'ng butang kinahanglan ipaulahi kay ang dapat tagaan ug prayoridad ang dagko mang mga kinahanglan sa usa ka tawo.

Kinahanglan ingon ani usab ang pagpadapat og mga proyekto sa pangagamhanan, dapat unahon gayod sa gobyerno ang mga nag unang problema o suliran sa atong nasod. Ang ekonomiya mao'y nag una nga suliran sa atong gobyerno mao'ng dapat gayod nga kini ang unahon sa pagsulbad sa atong mga lider. Ikaduha ang peace and order kay og walay kalinaw ang atong nasod, wala usab gustong mamuhunan nga mga foreign investors sa kapupud-ang Pilipinhon kay mahadlok man sila tungod sa pagka walay seguridad sa ilang tagsa-tagsa ka mga kaugalingon. Ikatulo ang Infrastaktura, kinahanglan gayod nga makompleto ang mga farm to market roads sa tibuok PILIPINAS alang sayon na lang pagpadangat sa mga mag-uuma sa ilang mga produkto sa mga kalungsuran ug mga dakbayan, kinahanglan gayod nga suportahan ang mga mag-uuma apil na ang mga mangingisda kay kung wala sila wala usab kitay maka-on.Tagaan usab ug prayoridad ang problema sa panglawas sa katawhan (health) kay mag-unsa na man lang ang ugma sa Pilipinas kung ang lumulupyo niini mga masakiton.

Ang pagsumpo sa kapobrehon sa mga PILIPINO usa usab ka suliran nga angay sagubangon sa gobyerno. Tinood nga ang gobyerno naa nay mga lakang sa pagsumpo niining kapobrehon nga gina atubang sa mayorya sa mga Pilipino pinaagi sa pagtukod sa DSWD ug sa 4 P's o cash transfer program sa gobyerno apan duna pay gamay nga problema kay ang kuwarta nga ginahatag sa mga pobreng lungsuranon puwede man ilahang abusaran sama sa paggamit niini sa pagpalit og bino, ug uban pang mga materyal nga butang, puwede pud nila isugal ang kuwarta nga gikan sa cash transfer program sa gobyerno. Mao nga ako naga rekomendar nga imbes kuwarta ang ihatag sa pobreng katawhang Pilipino RASYON na lang o pagkaon ang ihatag kanila. Ang modelo nato niini mao ang Amerika ug ang kanhi Komunista nga gobyerno sa Russia.

Mao kana ang mga nag-unang problema sa atong nasod nga angay gayod unahon sa gobyerno. Aron maka focus nianang mga sulirana, ipaulahi na lang ang mga gagmay'ng suliran sa nasod sama sa PAUGNAT SA KUSOG (Sports) ug TURISMO. Tinood nga angay pod mo improve ang Pilipinas sa mao nga mga natad apan dili kaayo na importante ikomparar sa akong mga gipang latid ug gipang saysay sa unahan nga mga nag-unang nasodnong suliran. Ako nang- hinaot nga ang akong mga suhestiyon tagaan og gibug-aton sa mga awtoridad nga anaa sa poder sa pangagamhanan nga angay ug alang sa kaayohan sa tanan. Hinaot pa unta.