MGA POLITICAL PARTIES DILI MGA FRATERNITIES

By Bayawanon

Naa lang ko'y nabantayan sa ato'ng pamulitika sa Pilipinas, ako'ng namatikdan nga kusog jud kaayo ang party loyalty sa mga pulitiko sa tagsa-tagsa nila ka mga partido. Kalabanan sa mga party members molaban jud sa ila'ng mga miyembro ug mga lideres ma insakto man o masayop kini. Ug ang usa ka miyembro sa partido maigo ug usa ka issue molaban gilayon ang iyang mga kauban sa iyahang partido bisan pa'g dunay igo'ng ikapamatood ang pikas grupo. Maayo ba kini nga timailhan sa pag uswag sa atong sistema politikal dinhi sa Pilipinas? Ang tubag usa ka dakong DILI kay kinahanglan ang interes sa KATAWHAN lamang ang mopatigbabaw tungod kay ang tinood nga partido mao man ang KATAWHAN.

Huna-hunaon unta sa atong mga pulitiko nga mopatigbabaw ang interes sa ilang mga constituents kay sa ilang mga partido. Undangon na unta nila ang pag pakig-away sa usa'g usa sa ngalan sa tinood nga pag pangalagad sa katawhan, kay sa ilang pag panagbangi daghan nga mga proyekto ang dili matagad ug mabiyaan na hinoon. Dili ba kasagaran sa mga rason sa mga pulitiko mao nga modalagan sila og mo serbisyo sa katawhan kay ang pag-alagad sa katawhan sama man usab sa pag alagad sa DIOS? Nan ngano man nga mag-away man sila nga usa lang man ang ilang katuyoan nga mao ang pag-alagad sa katawhan ug sa DIOS?

Ang ilang panag-away nahisusama sa usa ka FRAT WAR nga grabe ra kaayo nga nakaapekto sa kaayohan sa katawhan. Ila unta'ng huna-hunaon nga ang pulitika dili usa ka away sa mga fraternities ug nga ang ila'ng mga political parties dili sama sa mga fraternities. Isilsil unta nila sa ilang mga alimpatakan ang panultihon ni kanhi Presidente Manuel Luis Quezon nga nag-ingon nga "My loyalty to my party ends when my loyalty to the people begins" kay sa ako nang gisulti sa unahan ... ang tinood nga partido mao man ang katawhan.

Tungod niini'ng mga butang nga akong nahisgutan sa unahan, ako nanghinaot nga ang tanang mga pulitiko og lideres nga mga PILIPINO magkahiusa na unta alang sa pag uswag sa katawhang PILIPINHON, kay kinsa pa man diay ang maningkamot alang sa pag uswag sa YUTANG TABUNON kung dili ang mga Pilipino usab nga gi representahan sa ila'ng mga lider? Hinaut nga ang akong mensahe makadan-ag unta sa tanan alang sa paglambo sa atong minahal nga nasod ang Perlas sa Silangan, ang Pilipinas.