INDUSTRIYALISASYON YAWI SA KALAMBUAN

By Felizar Tasa Mortillero

Sa akong pag panuki-duki ug pagbasa-basa sa mga libro sa kasaysayan ako'ng nadiskubrehan ug nahibaw-an nga bisan ang dagko ug kusgan nga mga nasud ug mga kontinente nag-agi usab ug kalisod. Ang Amerika, Inglatera (England), Hapon (Japan), Tsina (China), Alemanya (Germany) ug bisan pa ang kusgan nga kontinente nga Europa nag agi ug kalisod kaniadto tungod sa rason nga layo pa kaayo sila sa sibilisasyon. Ang mga tawo niining mga nahisgotan nga mga lugar kasarangan panguma ra gayud ang ilang pangita, apan sa diha'ng ang mga lugar, nasud ug kontinente nga nahisgotan sa itaas naka desisyon sa pagsulod ug pagsulay sa modernisasyon pinaagi sa industriyalisasyon ang nahisgotan nga mga lugar,nasud ug kontinente nahaw-as sa kalisud ug nangahimo pa gani'ng mga dagko nga mga pangulo sa patigayon/negosyo tungod sa modernong paagi sa panginabuhi pinaagi sa industriya.

Tungod niini'ng akong nahisgotan sa unahan, ako naga-ampo nga sundon sa atong nasud ang mga pamaagi sa paghimo'g mga produkto sa mga nahisgutan nga mga nasud sa itaas, kay ug magpabilin lamang kita sa kinaraan nga paagi sa panginabuhi hayan nga mabiyaan gayud kita sa ato'ng nga silingan sa Asya ug layo-layo pa gayud. Ato unta sundo'ng modelo ang mga nasud ug kontinente nga akong nahisgutan sa itaas aron nga ang PILIPINAS dili magpabilin nga "SICK MAN OF ASIA".

Tinood nga duna'y mga dili maayo'ng mahitabo sa kinaiyahan ug mosulod gayud ang PILIPINAS sa kinakusgan nga modernisasyon kay daghan na man unya nga mga factoriya/industriya ang manulod sa atong nasud, apan kining posibleng mahimugsong suliran mabalanse usab sa atong pagpakusgan sa kinaiyahan sama sa pag tanom ug mga kahoy sa atong mga upaw na nga mga kabukiran. Kinahanglan usab nga edukaron gayud ang katawhan nga dunay kalabutan sa pagpakusgan sa atong kinaiyahan kay mag-unsa na lang man ang atong pag-uswag ug maguba ang ato'ng minahal nga KALIBUTAN sa sobra usab nga modernisayon ug industrialisasyon. Mag unsa ana lang man ang kuwarta kung ang pinakaulahing isda madakpan na? Mag-unsa na lang man ang pag asenso kung ang pinaka-ulahing suba nadaut na? Mag-unsa na lang man ang pag-uswag kung ang pinakaulahing kahoy naputol na? Mao nga balansehon gayud ang industriyalisasyon nga mamahimong yawi sa atong pag-uswag ug ang kinaiyahan aron duna kit'ay hapsay nga pag panginabuhi dinhi sa kalibutan. Hinaut pa unta.